ދިވެހިރާއްޖޭގެ އުއްތަމަ ފަނޑިޔާރު އއ. ހިމަންދޫ މެޖިސްޓްރޭޓް ކޯޓުގެ އިމާރާތް ރަސްމީކޮށް ހުޅުވައިދެއްވައިފި

ދިވެހިރާއްޖޭގެ އުއްތަމަ ފަނޑިޔާރު އޮނަރަބަލް އަލްއުސްތާޛު އަޙްމަދު މުޢުތަޞިމް ޢަދުނާން އއ. ހިމަންދޫ މެޖިސްޓްރޭޓް ކޯޓުގެ އިމާރާތް 28 އޮކްޓޫބަރު 2023 ވަނަ ދުވަހު ހުޅުވައިދެއްވައިފިއެވެ.

އއ. ހިމަންދޫގައި ބޭއްވުނު ރަސްމިއްޔާތު ޝަރަފްވެރިކޮށްދެއްވައި ދިވެހިރާއްޖޭގެ އުއްތަމަ ފަނޑިޔާރު ދެއްކެވި ވާހަކަފުޅުގައި އަދުލު އިންސާފު ފޯރުކޮށްދިނުމަކީ ބުރަ މަސައްކަތެއްކަމަށާއި އެހެންކަމުން އަދުލު އިންސާފު ފޯރުކޮށް ދިނުމުގެ މަސައްކަތް ފަނޑިޔާރުން ކުރައްވަންވާނީ ވިސްނުންތެރިކަމާއެކު ކަން ފާހަގަކުރެއްވިއެވެ. އަދި ފަނޑިޔާރުން މައްސަލަ ނިންމަވަނީ އަމިއްލަފުޅު ވިސްނުމުގައި ނޫންކަމަށާއި ރާއްޖޭގެ ގާނޫނުތަކާއި ގަވާއިދުތަކަށް ބަލާފަ އެންމެ އިންސާފުވެރި ގޮތަށްކަން ފާހަގަކުރެއްވިއެވެ. މީގެ އިތުރުން އުއްތަމަ ފަނޑިޔާރުގެ ވާހަކަފުޅުގައި އަދުލަށް ހުކުމްކުރާއިރު ތަފާތު ކުރުމެއް ނެތި، ހުރިހާ ފަނޑިޔާރުންވެސް އަދުލު އިންސާފު ގާއިމުކޮށްދިނުމަށް އިލްތިމާޒްކުރެއްވިއެވެ.

މިދަތުރުގައި ދިވެހިރާއްޖޭގެ އުއްތަމަ ފަނޑިޔާރުގެ އަރިހުގައި ޖުޑީޝަލް ސަރވިސް ކޮމިޝަނުގެ މެންބަރު އަދި ދިވެހިރާއްޖޭގެ ސުޕްރީމް ކޯޓުގެ ފަނޑިޔާރު އަލްއުސްތާޛާ ޢާއިޝާ ޝުޖޫން މުޙައްމަދު، ދިވެހިރާއްޖޭގެ ސުޕްރީމް ކޯޓުގެ ފަނޑިޔާރު އަލްއުސްތާޛު ޢަލީ ރަޝީދު ޙުސައިން އަދި ޗީފް ޖުޑީޝަލް އެޑްމިނިސްޓްރޭޓަރ އަލްއުސްތާޛާ ޢާއިޝަތު ރިޒްނާ ބައިވެރިވެވަޑައިގެންނެވިއެވެ.

މި ރަސްމިއްޔާތުގައި ޗީފް ޖުޑީޝަލް އެޑްމިނިސްޓްރޭޓަރ އަލްއުސްތާޛާ ޢާއިޝަތު ރިޒްނާ ދެއްކެވި ވާހަކަފުޅުގައި، އިމާރާތުގެ މަސައްކަތް ފުރިހަމަކުރުމަށްޓަކައި އއ. ހިމަންދޫ މެޖިސްޓްރޭޓް ކޯޓުންނާއި މަސައްކަތް ޙަވާލުކުރެވުނު ކޮންޓްރެކްޓަރގެ ފަރާތުން ކޮށްދެއްވި މަސައްކަތް ފާހަގަކޮށް، އެފަރާތްތަކަށް ވަނީ ޝުކުރު ދަންނަވާފައެވެ. އަދި އއ. ޖުޑީޝަލް ދާއިރާގެ އިސް މެޖިސްޓްރޭޓާއި އއ. ހިމަންދޫ މެޖިސްޓްރޭޓް ކޯޓުގެ މުވައްޒަފުންނާއި ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަންގެ މުވައްޒަފުން މެދުކެނޑުމެއްނެތި ކުރެއްވި ބުރަ މަސައްކަތުގެ އަގު ވަޒަންކޮށް އެފަރާތްތަކަށްވެސް ވަނީ ޝުކުރު ދަންނަވާފައެވެ.  އަދި ރަސްމީކޮށް ހުޅުވުނު ހިމަންދޫ މެޖިސްޓްރޭޓް ކޯޓު އިމާރާތުގައި މަސައްކަތްކުރަން ފެށުމާއެކު، ކޯޓުން ޢާންމުންނަށް ފޯރުކޮށްދޭ ޚިދުމަތްތަކުގެ ފެންވަރު ރަނގަޅުވެ، އަދުލު އިންސާފަށް ފަސޭހައިން ވާސިލްވެވޭނެ މަގު ތަނަވަސް ކުރުމަށް ކުރަމުން ގެންދާ މަސައްކަތް އިތުރަށް ހަލުވިވެގެން ދާނެކަމަށްވެސް ޗީފް ޖުޑީޝަލް އެޑްމިނިސްޓްރޭޓަރގެ ވާހަކަފުޅުގައި ވަނީ ފާހަގަކުރައްވާފައެވެ.

އއ. ހިމަންދޫ މެޖިސްޓްރޭޓް ކޯޓުގެ އިމާރާތަކީ، 2022 ވަނަ އަހަރުގެ ޖޫން މަހުގެ 16 ވަނަ ދުވަހު ކޮންޓްރެކްޓް އުސޫލުން ރީޖަނަލް ބިލްޑަރސް ޕްރައިވެޓް ލިމިޓެޑްއާ ޙަވާލުކުރެވިގެން ކުރެވުނު މަސައްކަތެކެވެ.

އއ. ހިމަންދޫ މެޖިސްޓްރޭޓް ކޯޓު މީގެ ކުރިން ހިންގަމުން އައިސްފައިވަނީ ރަށުއޮފީހާއި ރަށުކޯޓު ހިންގުމަށްޓަކައި، ޢިމާރާތްކޮށް 1988 ވަނަ އަހަރު ބޭނުންކުރަންފަށާފައިވާ ޢިމާރާތުން، ކޯޓު ހިންގުމަށް ލިބިފައިވާ، ކުޑަ 02 ކޮޓަރިއާއި، ކުޑަ ސިޓިންގ ރޫމަކާއި، ފާޚާނާއެއް ހިމެނޭ ބައެއްގައެވެ.

އެހެންނަމަވެސް، މިހާރު ރަސްމީކޮށް ބޭނުންކުރަން މިފެށުނު އއ.ހިމަންދޫ މެޖިސްޓްރޭޓް ކޯޓުގެ އިމާރާތް ފަރުމާކުރެވިފައިވަނީ، ކުދި އާބާދީތަކުގެ މެޖިސްޓްރޭޓް ކޯޓެއްގައި އާއްމުކޮށް ހިމެނޭ ކަންކަން ހިމަނައިގެން، މިހާރުގެ ޤާނޫނުތަކުން ތަސައްވަރު ކުރާ ފަދަ ގޮތަކަށް ޝަރީޢަތްތައް ހިންގުމަށް ބޭނުންވާނެ ޖާގައާއި ވަސީލަތްތައް ހިމެނޭ ގޮތަށެވެ.

އެގޮތުން ޝަރީޢަތްކުރާނެ ސްޓޭންޑަޑް ސައިޒްގެ 01 ކޯޓުރޫމާއި، މެޖިސްޓްރޭޓުންނާއި މުވައްޒަފުން މަސައްކަތްކުރުމަށް ވަކިން ޚާއްޞަކުރެވިފައިވާ ބައިތަކުގެ އިތުރުން ސްޓޭންޑަރޑް ކޯޓެއްގައި ފުރިހަމަވާންޖެހޭ ގިނަ ކަންކަން ހިމެނޭގޮތަށެވެ. އޭގެ ތެރޭގައި ޝަރުޢީ ލިޔެކިޔުންތައް އަރުޝީފް ކުރާނެ ޖާގައިގެ އިތުރުން ޢާންމުންނަށް ޚިދުމަތް ފޯރުކޮށް ދިނުމަށް ފަސޭހަވާނެހެން ރިސެޕްޝަން އޭރިއާއަކާއި ވެއިޓިންގ އޭރިއާއެއްވެސް ހިމެނެއެވެ.

ދިވެހިރާއްޖޭގެ އުއްތަމަ ފަނޑިޔާރު އއ. އަތޮޅަށް ކުރެއްވި މި ދަތުރުފުޅުގައި އއ. ތޮއްޑޫ މެޖިސްޓްރޭޓް ކޯޓު، އއ. އުކުޅަސް މެޖިސްޓްރޭޓް ކޯޓު، އއ. ރަސްދޫ މެޖިސްޓްރޭޓް ކޯޓު، އއ. ހިމަންދޫ މެޖިސްޓްރޭޓް ކޯޓު، އއ. ފެރިދޫ މެޖިސްޓްރޭޓް ކޯޓު އަދި އއ. މަތިވެރި މެޖިސްޓްރޭޓް ކޯޓަށް ޒިޔާރަތް ކުރެއްވިއެވެ. އަދި އއ. ޖުޑީޝަލް ދާއިރާގެ ހުރިހާ މެޖސްޓްރޭޓުންނާއި، މުވައްޒަފުންނާ ބައްދަލުކުރައްވާފައިވެއެވެ. މި ބައްދަލުވުންތަކުގައި ކޯޓުގެ މަސައްކަތްތަކުގައި ދިމާވާ ދަތިތަކާ ގުޅޭ ގޮތުން މެޖިސްޓްރޭޓުންނާއި މުވައްޒަފުންނާ ވާހަކަ ދައްކަވާފައިވެއެވެ.